У Полацку прайшла хваля затрыманняў праз падрыў цягнікоў у тунэлі БАМ у Расіі — праваабаронцы

10 снежня 2023 у 1702233720
«Зеркало»

У Полацку адбыліся затрыманні ў сувязі з дыверсіяй у расійскім тунэлі БАМ, у якой абвінавачваюць беларуса Сяргея Ерамеева, піша праваабарончы цэнтр «Вясна».

Выява выкарыстоўваецца ў якасці ілюстрацыі. Фота: TUT.BY

Праваабаронцам стала вядома, што як мінімум частка затрыманняў датычыла Сяргея Ерамеева, затрыманага ў Расіі па абвінавачанні ў тэракце на БАМе.

«Вядома пра выпадак, калі затрыманне і ператрус прайшлі ў чалавека, які цалкам выпадкова кантактаваў з Ерамеевым апошнімі днямі. Некалькіх затрыманых адпусцілі, адабраўшы ў іх тэлефоны, лёс астатніх невядомы. Затрыманні праводзіў КДБ», - паведамляюць праваабаронцы.

Паводле інфармацыі «Позірку», 9 снежня ў Полацку і Наваполацку (Віцебская вобласць) супрацоўнікі Камітэта дзяржаўнай бяспекі затрымалі каля 20 чалавек.

Нагадаем, увечары 29 лістапада на перагоне Ітыкіт - Акусікан падчас руху праз тунэль на Байкала-Амурскай магістралі загарэўся вагон грузавога цягніка, у склад якога ўваходзіла 41 цыстэрна з палівам, тры - з авіяцыйным палівам і шэсць вагонаў з чорным металам.

Пазней на гэтым жа ўчастку адбыўся другі падрыў грузавога цягніка, які рухаўся аб'язным шляхам. У выніку чатыры цыстэрны з палівам згарэлі, яшчэ дзве атрымалі пашкоджанні. Паліва разлілося на плошчы 150 квадратных метраў.

Выбухі цягнікоў у Паўночнамуйскім тунэлі БАМа кваліфікавалі як тэракт.

7 снежня ФСБ Расіі паведаміла пра затрыманне ў Омску падазраванага ў тэракце грамадзяніна Беларусі, які «даў прызнальныя паказанні пра працу пад кантролем украінскіх спецслужбаў».

На судзе стала вядома, што мужчыну завуць Сяргей Ерамееў, яму 52 гады. Ён працуе як індывідуальны прадпрымальнік, мае двух малагадовых дзяцей, раней судзімы не быў. У Расіі ў яго няма пастаяннага месца рэгістрацыі.

Віну Ерамееў прызнаў, а ў судзе заявіў, што хацеў паралізаваць рух на чыгунцы, каб перашкодзіць перавозіць ваенныя грузы.

- Я напісаў у тлумачэнні, што праз БАМ цяпер вязуць боепрыпасы <…>. Галоўная мэта была - перашкодзіць руху, - сказаў ён.

У выніку суд арыштаваў беларуса да 30 студзеня 2024 года.