Дэпутат расійскай Дзярждумы заявіў, што Лукашэнка хварэе

Першы намеснік кіраўніка думскага камітэта па справах СНД Канстанцін Затулін сказаў расійскаму выданню «Подъём», што яму вядома, на што хварэе Лукашэнка, але дыягназу не назваў.

— Там нічога такога звышнатуральнага няма, гэта не кавід. Проста чалавек захварэў. Нягледзячы на тое, што чалавек захварэў, палічыў сваім абавязкам прыехаць у Маскву, а потым увечары таго ж дня праводзіў мерапрыемствы ў Мінску. Напэўна, мае патрэбу ў пэўным адпачынку — вось і ўсё, — адзначыў дэпутат.

Нагадаем, сёння ў Беларусі адзначаюць Дзень дзяржаўных сцяга, герба і гімна. У Мінску прайшоў урачысты рытуал ушанавання дзяржаўных сімвалаў, але Аляксандр Лукашэнка зноў не з’явіўся на публіцы. На цырымоніі выступіў прэм’ер-міністр Раман Галоўчанка і зачытаў зварот ад Лукашэнкі.

Пра стан беларускага палітыка ці нават пра месца, дзе ён цяпер знаходзіцца, нічога не вядома. З моманту ўрачыстых мерапрыемстваў на 9 траўня ў Маскве і Мінску Лукашэнка не паказваўся ў публічным полі, ніякіх мерапрыемстваў з яго асабістым удзелам не праводзілася (што, як мы высветлілі, вельмі дзіўна). Пры гэтым прэс-служба Лукашэнкі і чыноўнікі маўчаць.

Вядома толькі, што ўвечары 13 траўня картэж у суправаджэнні «Стралы» прыехаў на тэрыторыю лечкамісіі — у Рэспубліканскі клінічны медыцынскі цэнтр Упраўлення справамі прэзідэнта, пісала «Еўрарадыё» са спасылкай на чытачоў.

Паводле інфармацыі выдання, пад’езды да бальніцы былі перакрытыя, а ўздоўж дарог, якія вядуць да яе, выставілі сілавікоў.

Як паведамляў праект «МотолькоПомоги», у клініку ў Драздах прыехаў Аляксандр Лукашэнка. Ён прабыў там дзве гадзіны. Картэж пакінуў тэрыторыю Рэспубліканскага клінічнага медыцынскага цэнтра ў раёне 21.00, а каля 21.20 заязджаў у Астрашыцкі Гарадок.

Чытайце таксама