Калі грамадзяне Беларусі, якія законна жывуць у Германіі, праз палітычны пераслед не могуць вярнуцца на радзіму для афармлення пашпарта, яны могуць прэтэндаваць на атрыманне ў ФРГ праязнога дакумента для замежнікаў (Reiseausweis für Ausländer). Пра гэта DW паведамілі ў Міністэрстве ўнутраных справаў Германіі.
Указ Аляксандра Лукашэнкі, які забараняе выдаваць пашпарты за мяжой, у МУС Германіі назвалі «мэтаскіраванымі рэпрэсіямі супраць праваабаронцаў, журналістаў і прадстаўнікоў апазіцыі». «Гэты ўказ мае далекасяжныя наступствы для беларусаў дыяспары. Асабліва гэта датычыць тых беларускіх грамадзян, якія былі вымушаныя пакінуць Беларусь праз палітычны пераслед і якім пагражаюць рэпрэсіі і нават турэмнае зняволенне ў выпадку паўторнага ўезду ў краіну», — заявілі ў МУС ФРГ.
Калі тэрмін дзеяння пашпарта грамадзяніна Беларусі заканчваецца, нямецкае ведамства па справах замежнікаў можа праверыць, ці можна чалавеку вяртацца ў Беларусь для атрымання новага пашпарта ці яму можа быць выдадзены нямецкі дакумент, які замяняе пашпарт, патлумачылі ў МУС. У міністэрстве падкрэслілі, што «асаблівыя абставіны», якія пацвярджаюць, што беларусу небяспечна вяртацца на радзіму па пашпарт, трэба будзе тлумачыць і даказваць.
Рашэнне па кожным выпадку будзе прымацца індывідуальна
«Мяркуючы з паведамленняў пра арышты грамадзян Беларусі, якія выехалі назад у сувязі з указам, можна дапусціць немэтазгоднасць атрымання пашпартоў для беларусаў, якія даказана падвергліся палітычным пераследам», — гаворыцца ў адказе МУС. Іміграцыйныя ўлады будуць прымаць рашэнні наконт выдачы нямецкіх дакументаў, якія замяняюць пашпарт, асобна ў кожным канкрэтным выпадку. Абавязковая ўмова — законныя падставы для пражывання ў Германіі.
Калі нямецкі іміграцыйны орган палічыць зварот грамадзяніна Беларусі абгрунтаваным, ён выдасць праязны дакумент для замежнікаў. Гэты праязны дакумент з абмежаваннямі дазваляе падарожнічаць па Шэнгенскай зоне і ў некаторыя трэція краіны. Дакумент яшчэ называюць «шэрым праязным» — праз колер вокладкі. Працэс іх выдачы рэгулюецца пятым параграфам пастановы пра знаходжанне, нагадалі ў МУС.
Нагадаем, з верасня 2023 года грамадзяне Беларусі не могуць абмяняць пашпарт або падоўжыць дзеянне свайго пашпарта ў пасольствах і консульствах за мяжой, для гэтага трэба асабіста прыехаць у Беларусь.