Літва адправіла ў Беларусь 50-гадовую расіянку, якая знаходзіцца ў цяжкім стане. Яе лячылі ў мясцовай бальніцы пасля экстраннай пасадкі самалёта Анталья — Масква, але потым вырашылі вярнуць на радзіму, паведамляе The Baltic Times са спасылкай на прэс-сакратара службы аховы дзяржаўнай мяжы Літвы Гедруса Місуціса.
Расіянку даставілі з Літвы ў Беларусь 10 кастрычніка ў 9.00 паводле літоўскага часу (10.00 паводле беларускага). Жанчыну на хуткай прывезлі ў пункт пропуску «Мядзінінкай» (з беларускага боку — «Каменны Лог»), дзе перадалі беларускім медыкам і чыноўнікам.
— Яна была перададзеная беларускай службе хуткай дапамогі ў цяжкім стане, яе суправаджала дачка, якая ўдзельнічала ў тэхнічных аспектах транспартавання жанчыны, — адзначыў Місуціс.
Ён расказаў, што 18 кастрычніка самалёт, які ляцеў з Антальі ў Маскву, быў вымушаны прызямліцца ў аэрапорце Вільнюса праз праблемы са здароўем жанчыны і перадаць яе брыгадзе медыкаў, а потым працягнуў шлях.
Пасля гэтага 50-гадовая грамадзянка Расіі лячылася ў літоўскай клініцы «з гуманітарных меркаванняў». Аднак літоўская памежная служба прыняла рашэнне вярнуць жанчыну на радзіму — яе абавязалі пакінуць тэрыторыю краіны і адправілі ў Беларусь.
Падкрэсліваецца, што паветраным суднам, зарэгістраваным у Расіі або належаць грамадзянам РФ, не дазволена выкарыстоўваць паветраную прастору краін Еўрасаюза з прычыны санкцый, але гэтая забарона не распаўсюджваецца на вымушаныя пасадкі ў выпадку пагрозы здароўю ці жыццю пасажыраў — як у гэтым выпадку.