У Пастаўскім раёне 25 сакавіка скончыў жыццё самагубствам салдат тэрміновай службы. Пра гэта «Люстэрку» расказалі дзве не звязаныя паміж сабой крыніцы. Маладога чалавека звалі Мікіта Літвіновіч. Ён служыў у 19-й асобнай гвардзейскай механізаванай брыгадзе, дыслакаванай у вёсцы Заслонава Віцебскай вобласці. У сярэдзіне сакавіка брыгаду адправілі бліжэй да літоўскай мяжы ў межах праверкі боегатоўнасці.
Мікіта Літвіновіч нарадзіўся ў 2003 годзе ў горадзе Паставы. Улетку 2022-га скончыў Пастаўскі дзяржаўны каледж па спецыяльнасці «Тэхнічнае забяспечанне сельскагаспадарчых работ. Эксплуатацыя і рамонт аўтамабіляў». Увосень таго ж года хлопца прызвалі на тэрміновую вайсковую службу.
Малады чалавек трапіў у 19-ю асобную гвардзейскую механізаваную брыгаду, служыў памочнікам гранатамётчыка.
15 сакавіка 2024 года прэс-служба Міністэрства абароны паведамляла, што ў межах праверкі баявой гатоўнасці злучэнняў і вайсковых частак гэтай брыгадзе «трэба будзе выйсці ў прызначаныя раёны і пасля іх заняцця быць у гатоўнасці да правядзення серыі вучэнняў, у тым ліку з баявой стральбой».
Паводле інфармацыі маніторынгавай групы «Беларускі Гаюн», 19-я брыгада мусіла адправіцца ў Ашмянскі раён. Але знаёмыя Мікіты Літвіновіча сцвярджаюць, што малады чалавек апынуўся пад роднымі Паставамі, ля аграгарадка Камаі за 10 кіламетраў ад мяжы з Літвой.
25 сакавіка малады чалавек скончыў жыццё самагубствам.
— Камандзіры не паведамілі бацькам ніякіх падрабязнасцяў, — расказала «Люстэрку» крыніца. — Бацьку ўдалося толькі даведацца, што разам са сваімі калегамі Мікіта «прыехаў на пункт», выйшаў пакурыць і застрэліўся.
Паводле нашага суразмоўцы, ніякіх перадумоваў да самагубства ў паводзінах хлопца не было:
— Мікіта быў вельмі добрым чалавекам, заўсёды трымаўся на пазітыве. Не магу ўявіць, што яго магло прымусіць здзейсніць суіцыд.
Мікіту Літвіновіча пахавалі сёння, 27 сакавіка, у яго родных Паставах.
Міністэрства абароны афіцыйна пра гэта надзвычайнае здарэнне ў частцы нічога не паведамляла. Журналісту «Люстэрка» не ўдалося аператыўна атрымаць каментар ні ў вайсковай частцы, дзе служыў Мікіта, ні ў Мінабароны.
Чытайце таксама
