Кіеў гатовы вярнуцца за стол перамоваў, заявіў прэзідэнт ЗША Дональд Трамп падчас традыцыйнага звароту да Кангрэсу. Ён расказаў, што атрымаў паведамленне ад прэзідэнта Украіны Уладзіміра Зяленскага.
«Ніхто не хоча міру больш, чым Украіна, сказаў Зяленскі, мая каманда гатовая працаваць разам з прэзідэнтам Трампам і яго камандай пад лідарствам прэзідэнта Трампа, каб дасягнуць доўгатэрміновага міру, і мы вельмі ўдзячныя ЗША за дапамогу ў захаванні суверэнітэту і бяспекі. І Украіна гатовая падпісаць дамову пра супрацоўніцтва з ЗША, калі вам будзе зручна. Атрымаў я гэты ліст літаральна нядаўна», — расказаў Трамп.
Ён дадаў, што таксама атрымлівае «сур'ёзныя сігналы» ад Расіі, што і гэтая краіна гатовая да міру.
«Прыйшоў час спыніць гэтае вар’яцтва. Час спыніць забойствы. Час спыніць гэтую бессэнсоўную вайну. Калі вы хочаце спыніць войны, вы павінныя гаварыць з абодвума бакамі», — сказаў Трамп.
Напярэдадні Зяленскі апублікаваў заяву ў X на англійскай і ўкраінскай мовах, дзе выказаў шкадаванне з нагоды сваркі з Трампам і віцэ-прэзідэнтам ЗША Джэй Дзі Вэнсам у Белым доме і падкрэсліў, што гатовы працаваць дзеля заканчэння вайны пад кіраўніцтвам Трампа.