Масква (Расія) зазнала самую маштабную атаку беспілотнікаў з пачатку вайны, піша The Moscow Times.
Раніцай 11 сакавіка ўкраінскія беспілотнікі масіравана атакавалі Маскву, паведаміў мэр сталіцы Сяргей Сабянін. Паводле яго звестак, прыкладна з 4.30 да 7.00 паводле мясцовага часу (супадае з мінскім) на падлёце да горада збілі 69 дронаў. У выніку падзення абломкаў у Маскоўскай вобласці загінуў адзін чалавек — ахоўнік дыстрыбутарскага цэнтра «Мироторг» у Дамадзедаве. У момант падзення беспілотніка ён знаходзіўся побач з аўтамабілем на паркоўцы, піша Shot. Праз моцны пажар цалкам выгаралі 20 машын. Яшчэ тры чалавекі атрымалі раненні ў гарадах Відным і Дамадзедаве, паведаміў губернатар Падмаскоўя Андрэй Вараб’ёў.
«Таксама абломкі беспілотнікаў зваліліся на шматкватэрны дом у Раменскім, дзе пашкоджаныя як мінімум сем кватэр з 19-га да 22-га паверха дома на Паўночнай шашы. З іх эвакуяваныя 12 чалавек, уключаючы траіх дзяцей», — удакладніў губернатар.
Выклікі ў экстранныя службы з нагоды беспілотнікаў паступілі з Каломны, Зарайска, Срэбных Сажалак, Серпухава, Раменскага, Васкрасенска, Лухавіц, Бронніц, Дамадзедава, Ленінскага, Падольска, Электрасталі і Кацельнікаў, дадаў Вараб’ёў. Паводле звестак Shot, у вёсцы Сапронава абломкі збітага дрона ўрэзаліся ў верхнія паверхі жылога комплексу «Квартал заходні», у вёсцы Місайлава пашкоджанні атрымаў ЖК «Прыгарад Лясное», дах якога загарэўся, таксама дрон трапіў у верхнія паверхі жылога шматпавярховіка на вуліцы Дамадзедаўскай у Маскве.
Паводле папярэдняй інфармацыі, у выніку атакі беспілотнікаў на Падмаскоўі загінулі два чалавекі. Яшчэ 14 атрымалі раненні.
У Мінабароны РФ паведамілі, што ноччу 11 сакавіка дзяжурнымі сродкамі супрацьпаветранай абароны «перахопленыя і знішчаныя 337 украінскіх беспілотных лётных апаратаў»:
- 91 БПЛА — над тэрыторыяй Маскоўскай вобласці,
- 126 БПЛА — над тэрыторыяй Курскай вобласці,
- 38 БПЛА — над тэрыторыяй Бранскай вобласці,
- 25 БПЛА — над тэрыторыяй Белгародскай вобласці,
- 22 БПЛА — над тэрыторыяй Разанскай вобласці,
- 10 БПЛА — над тэрыторыяй Калужскай вобласці,
- восем БПЛА — над тэрыторыяй Ліпецкай вобласці,
- восем БПЛА — над тэрыторыяй Арлоўскай вобласці,
- шэсць БПЛА — над тэрыторыяй Варонежскай вобласці і
- тры БПЛА — над тэрыторыяй Ніжагародскай вобласці.
Па факце масіраваных атак на маскоўскі рэгіён беспілотнымі лётнымі апаратамі, у выніку якіх ёсць загінулы і пацярпелыя, распачатая крымінальная справа па артыкуле «Тэрарыстычны акт».
«Да расследавання прыцягнутыя вопытныя следчыя і крыміналісты цэнтральнага апарата СК Расіі, а таксама эксперты СЭЦ ведамства. У рамках расследавання будуць высветленыя абставіны здарэння, тыпы беспілотных лётных апаратаў і выбуховых прыстасаванняў, а таксама сума нанесенай шкоды», — паведаміла афіцыйная прадстаўніца Следчага камітэта Расіі Святлана Пятрэнка.