Адной з умоваў 30-дзённага спынення агню прэзідэнт РФ Уладзімір Пуцін назваў спыненне паставак зброі Украіне. Пра гэта Bloomberg паведамілі крыніцы ў Еўропе і Расіі.
Як піша агенцтва, паводле крыніц з Масквы, што ведаюць пра задумы Крамля, Расія хоча поўнага спынення паставак зброі Украіне, пры гэтым мінімальная мэта — спыненне дапамогі з боку ЗША.
Высокапастаўлены еўрапейскі чыноўнік сказаў Bloomberg, што Еўропа вельмі неахвотна згаджаецца на патрабаванне РФ Расіі заблакаваць пастаўкі зброі Украіне падчас любога перамір'я. Такі вынік рызыкуе стварыць сітуацыю, калі Расія зможа пераўзброіць сваё войска падчас спынення баявых дзеянняў, у той час як Украіна — не, сказаў чыноўнік.
Адміністрацыя Трампа фактычна ўжо саступіла расійскім патрабаванням захаваць кантроль над акупаванай украінскай тэрыторыяй, а таксама адмовіць Кіеву ва ўступленні ў NATO. Гэта ўзмацніла асцярогі Еўропы, што любая ўгода, якую прэзідэнт ЗША заключыць з Пуціным, аслабіць Украіну і зробіць яе ўразлівай для Расіі ў будучыні.
ЗША таксама, імаверна, захочуць, каб Украіна прыняла фактычны нейтральны статус, а таксама скараціла сваё войска і ўзбраенне ў адпаведнасці з патрабаваннямі Расіі.
Паводле адной з крыніц у Маскве, прыпыненне паставак зброі, якога патрабуе Пуцін, будзе часовым, і пастаўкі адновяцца пасля заключэння мірнага пагаднення, у якім Украіна павінная пагадзіцца на абмежаванні свайго вайсковага патэнцыялу.
Тэлефонная размова Пуціна з Трампам мае адбыцца сёння, 18 сакавіка, паміж 16.00 і 18.00 паводле Масквы.
Акрамя спынення агню тэлефонная размова Пуціна і Трампа таксама закране Запарожскую атамную электрастанцыю. Прэс-сакратар Белага дома Каралін Лівіт заявіла, што АЭС знаходзіцца ў паўднёва-ўсходняй Украіне «на мяжы» паміж Расіяй і Украінай. Гэта выклікала размовы пра магчымыя тэрытарыяльныя саступкі Расіі ў рамках мірнага працэсу.