У Мінску 6 сакавіка мужчына напаў з нажом на міліцыянта, які прыехаў на выклік, і параніў яго ў твар і шыю, той у адказ стрэліў. Праз тры дні ў МУС расказалі падрабязнасці інцыдэнту.
На лінію «102» каля 20.00 6 сакавіка паступіла паведамленне ад мінчанкі: праз падзел маёмасці ёй пагражаў былы муж. На месца прыбыў нарад патрульна-паставой службы Фрунзенскага РУУС.
«Зайшоўшы ў кватэру, супрацоўнікі запатрабавалі, каб агрэсар супакоіўся. Але ён працягваў паводзіць сябе задзірліва, выхапіў з адзення кухонны нож (загадзя падрыхтаваны, што сведчыць пра радыкальныя намеры) і кінуўся на міліцыянта. Вартавы парадку адказаў вокамгненна, ужыў табельную зброю, абараняючы не толькі сябе, але і заяўніцу і напарніка, якія знаходзіліся побач», — паведамілі ў МУС.
Цяпер 18-гадовы малодшы сяржант міліцыі знаходзіцца ў шпіталі. На трэція суткі пасля інцыдэнту ў МУС паведамілі, што сілавік дзейнічаў «правамерна і рашуча». Пра стан нападніка ў прэс-рэлізе не паведамляецца, але адзначаецца, што мужчына «раней прыцягваўся да крымінальнай адказнасці за абразы прадстаўнікоў улады, у 2020 годзе актыўна ўдзельнічаў у пратэстах».
Следчыя распачалі крымінальную справу за замах на забойства супрацоўніка органаў унутраных справаў. За гэта прадугледжанае пакаранне да дваццаці пяці гадоў пазбаўлення волі, або пажыццёвае зняволенне, або смяротнае пакаранне.
У МУС таксама нагадалі, што «супрацоўнік АУС пры выкананні службовых абавязкаў з’яўляецца прадстаўніком улады і знаходзіцца пад абаронай дзяржавы».
— Замах на яго ў любых формах цягне спыненне такіх дзеянняў, у тым ліку з ужываннем фізічнай сілы, спецсродкаў і зброі. Законныя патрабаванні міліцыянта абавязковыя для выканання. Супрацоўнікі міліцыі заўсёды дадуць адэкватны адказ на агрэсію. Гвалт у дачыненні да праваахоўнікаў не застанецца беспакараным, адказ будзе прынцыповым і жорсткім, — сказаў намеснік начальніка Галоўнага ўпраўлення ўласнай бяспекі МУС Іван Новікаў.