Новы прэпарат, які апісваецца як «самы блізкі да вакцыны супраць ВІЧ», насамрэч можа каштаваць усяго 40 даляраў на год для кожнага пацыента, і гэта ў тысячу разоў менш за яго цяперашнюю цану. Гэта высветлілі навукоўцы падчас новага даследавання, паведамляе The Guardian.
Гаворка ідзе пра ленакапавір, які прадаецца пад назвай «Сунленка». Яго выпускае амерыканская фармацэўтычная кампанія Gilead. Цяпер прэпарат каштуе 42 тысячы 250 даляраў за першы год для аднаго пацыента.
Кампанію заклікаюць зрабіць яго даступным і знізіць цану ў тысячу разоў, каб больш людзей ва ўсім свеце магло купіць гэтыя лекі.
У даследаванні, прадстаўленым на 25-й Міжнароднай канферэнцыі па СНІД у Мюнхене, гаворыцца, што эксперты падлічылі, што мінімальны кошт масавай вытворчасці джэнерыку, мяркуючы з кошту інгрэдыентаў і вытворчасці ленакапавіру, нават з уключэннем туды надбаўкі, каб атрымаць 30% прыбытку, склала 40 даляраў за год, з разліку, што яго будуць вырабляць для дзесяці мільёнаў чалавек штогод.
У UNAIDS заявілі, што даступнасць прэпарату для большасці жыхароў планеты магла б «адзначыць прарыў у прафілактыцы ВІЧ».
Ленакапавір уводзяць пацыентам шляхам ін'екцыі кожныя шэсць месяцаў, ён можа перадухіліць заражэнне і здушыць ВІЧ у людзей, якія ўжо інфікаваныя.
Падчас нядаўніх выпрабаванняў лекі забяспечылі 100-працэнтную абарону больш чым пяці тысячам жанчын у Паўднёвай Афрыцы і Угандзе.
На гэты момант прэпарат ліцэнзаваны для лячэння, але не для прафілактыкі.