Польшча дабіваецца ўключэння ў 11-ы пакет санкцый Еўрасаюза забароны рэгістрацыі ў краіне фірмаў з Беларусі і Расіі, а таксама аўтамабільных прычэпаў. Пра гэта заявіў у чацвер, 11 траўня, міністр інфраструктуры Польшчы Анджэй Адамчык.
«Адносна нядаўна, перад травеньскімі святамі, прэм’ер-міністр Матэвуш Маравецкі звярнуўся да Еўрапейскай камісіі з прапановай уключэння ў 11-ы пакет санкцый расійскіх і беларускіх аўтамабільных прычэпаў, а таксама забароны рэгістрацыі ў Польшчы фірмаў з расійскім і беларускім капіталам», — сказаў ён.
Так ён пракаментаваў страйк польскіх транспартнікаў, які пачаўся 9 траўня: дальнабойшчыкі сталі блакаваць апошні пункт пропуску на беларуска-польскай мяжы, які працуе для фураў. Такім чынам яны хочуць выказаць сваю нязгоду з «захопам рынку аўтамабільных грузаперавозак на ўсход беларускімі і расійскімі кампаніямі». Яны патрабуюць забараніць уезд у Польшчу паўпрычэпам з беларускай і расійскай рэгістрацыяй, прыпыніць дзейнасць беларускіх і расійскіх кампаній пад польскім прыкрыццём і абмежаваць ільготы для ўкраінскіх перавозчыкаў.
Страйкоўцаў падтрымлівае Асацыяцыя міжнародных аўтамабільных перавозчыкаў Польшчы. Польскія ўлады дазволілі ім праводзіць страйк да 9 чэрвеня.