Аляксандр Лукашэнка даў інтэрв'ю прарасійскай прапагандыстцы з Украіны Дзіяне Панчанка. Мы мусілі праслухаць яго цалкам, але навошта пакутаваць усім астатнім? Пастараліся максімальна скараціць.
Пра пачатак вайны Расіі супраць Украіны
Лукашэнка заявіў, што ў лютым 2022 года Расія пасля сумесных вайсковых вучэнняў у Беларусі пачала выводзіць войскі.
16 лютага 2022 года кіраўнік МЗС Беларусі, ужо нябожчык Уладзімір Макей, кажучы пра беларуска-расійскія вучэнні, катэгарычна заяўляў: «Ніводнага вайскоўца, ніводнай адзінкі баявой тэхнікі не застанецца пасля гэтых вучэнняў». А вось Аляксандр Лукашэнка быў іншага меркавання: 17 лютага ён расказаў, што яшчэ будзе абмяркоўваць гэтае пытанне з Уладзімірам Пуціным, а ўжо 20 лютага (у апошні дзень вучэнняў) Мінабароны Беларусі паведаміла, што войскі застаюцца. А 24 лютага расійскія войскі ўварваліся ва Украіну ў тым ліку з тэрыторыі Беларусі.
Ён таксама пакляўся, што не ведаў пра планы прэзідэнта Расіі Уладзіміра Пуціна пачаць вайну, але той напярэдадні прасіў яго «прыкрыць».
Пра ўдзел Беларусі ў вайне супраць Украіны
Лукашэнка заявіў, што Украіне дапамагаюць 55 краін, а Расіі — толькі Беларусь. Але браць непасрэдны ўдзел у баявых дзеяннях Беларусь не будзе: «Калі вы, украінцы, не пераступіце нашую мяжу, мы ніколі не будзем у гэтай вайне ўдзельнічаць».
Пра перамовы Беларусі і Украіны
Паводле Лукашэнкі, паміж Мінскам і Кіевам ідуць перамовы па лініі спецслужбаў, апошні раз яны праходзілі некалькі месяцаў таму: «Тэмы — уцягнутасць у перспектыве Беларусі ў вайну, будзе Беларусь ваяваць, не будзе на баку Расіі з поўначы. І шмат іншых пытанняў».
Пра «перажыванні» Пуціна
Паводле Лукашэнкі, Пуцін «перажывае» праз вайну ва Украіне.
«І ён кажа так задуменна (здаю інфармацыю): „Ніхто ж не думаў там падпарадкоўваць, занявольваць, пазбаўляць незалежнасці Украіну. Нам гэта не трэба было. Але трэба ж было сябе паводзіць адпаведным чынам і нам праблем не ствараць“», — расказаў Лукашэнка.
Пра імперскія амбіцыі Пуціна
«Што там імперскія нейкія замашкі, я гэтага не назіраў. Але сам думаю, што ў кіраўнікоў вялікіх дзяржаваў заўсёды грудзі распірае. Я сапраўды так, як чалавек, магу думаць. Гэта адносіцца і да Злучаных Штатаў Амерыкі», — заявіў Лукашэнка.
Пра ядзерную зброю
«Калі з боку Польшчы, Літвы, Латвіі пачнецца агрэсія супраць нашай краіны, мы адкажам імгненна ўсім тым, што ў нас ёсць. Разумееш, што ў нас сёе-тое ёсць. І ўдар будзе непрымальны», — прыгразіў ён.
Пра выбары ў Расіі
Лукашэнка лічыць, што наступным прэзідэнтам Расі зноў стане Уладзімір Пуцін: «Думаю, што наступны прэзідэнт у Расіі будзе Пуцін. Выбары праз паўгода. Супернікаў цяпер у Расіі Пуціну няма».
Пра выбары ў Беларусі
«Я не прыняў ніякіх рашэнняў, шчыра кажу. Можа, гэта нейкае наплявацельскае стаўленне да гэтага, але ў мяне столькі праблем, якія я мушу вырашаць. Прыйдзе час прымаць рашэнне — я прыму. Але цяпер трэба выстаяць, трэба вытрымаць. Трэба не ўляпацца ў якую-небудзь гісторыю, па-народнаму кажучы. Трэба правесці свой народ па гэтым вельмі тонкім, далікатным лёдзе, каб не праваліцца. Для мяне гэта цяпер галоўнае. І мая будучыня, і будучыня наступнай улады залежыць менавіта ад гэтага. Таму я займаюся гэтым. Шчыра, я не думаў, і нават у вузкім-вузкім сваім сямейным коле, са сваімі дзецьмі не абмяркоўвалі гэтую тэму. Цяпер не да гэтага», — з доляй какецтва заявіў Лукашэнка.
«Як звычайна, праз нейкі час пераходзім у прэзідэнцкую кампанію. Мы рыхтуемся з пункту гледжання захавання бяспекі для людзей. А астатняе — калі ласка, вы вырашайце. Як заўсёды, вырашаць будзе народ. Калі вы вырашыце, што патрэбнае вам іншае жыццё, — бог з вамі, паспрабуйце», — казаў Лукашэнка 22 сакавіка гэтага года.
Пра Мікалая Лукашэнку
Сваю першую практыку малодшы сын Аляксандра Лукашэнкі, Мікалай Лукашэнка, будзе праходзіць у расійскім адукацыйным цэнтры «Сірыус». «Гэта Уладзімір Уладзіміравіч Пуцін яму прапанаваў», — дадаў Лукашэнка.
Пра ўдзел Беларусі ў перамовах наконт міру ва Украіне
«Мы мяжуем з Украінай, мы фактычна „суагрэсары“, як прынята ў вас, і на Захадзе казаць. Натуральна, там ёсць нашыя інтарэсы, і нашая пазіцыя мусіць быць чутная. Таму я не выключаю, што Беларусь (на якім узроўні — гэта не абмяркоўваецца сёння) абавязаная, павінная быць уцягнутая ў перамоўны працэс», — лічыць Лукашэнка.
Пра страты Украіны падчас контрнаступлення
Лукашэнка заявіў, што Расія «перамеле» ўкраінскую «жывую сілу і тэхніку».
«Вас проста знішчаюць тысячамі. У вас 45 тысяч чалавек за час контрнаступу загінула і калекамі пайшлі адтуль. Страты ў вас на фронце адзін да васьмі», — сказаў ён.
Пра Зяленскага
Лукашэнка заявіў, што праблемы ва Украіны назапашваліся пачынаючы з яе першага прэзідэнта.
«І на неспрактыкаванага абсалютна не палітыка, чалавека чужога гэтай палітыцы, — на Валодзю Зяленскага гэта ўсё звалілася. Але ты (нават у кіно адкрыта — слуга народа) абяцаў, ты бачыў гэтыя праблемы: алігархі, злодзеі, жулікі. І сітуацыю вакол Украіны. Найпрыгажэйшай, найбагацейшай краіны. Ты гэта ўсё бачыў. Ты ўзваліў на свае плечы — цягні. Не па Саўку шапка!»
Варта адзначыць, што Лукашэнка не заўсёды так дабрадушна настроены ў дачыненні, як ён сказаў, да Валодзі Зяленскага. Так пасля інцыдэнту з расійскім самалётам у Мачулішчах ён называў прэзідэнта Украіны «гнідай», а ў першыя месяцы вайны — «безгаловым» і «напалеончыкам».
Пра новую сусветную вайну
«Захад, ведаю дакладна, вельмі не хоча ядзернай вайны. Бо выжыць нікому не ўдасца: Расія — першая краіна па запасах ядзерных боегаловак, прыкладна столькі ж у Злучаных Штатах Амерыкі. Уцягнутыя будуць усе, горача будзе. Таму ніхто не хоча паміраць, усе хочуць жыць хаця б так, як жывём, і спадзявацца на лепшае. Нават цяпер я не бачу абгрунтавання таму, што гэтая вайна магчымая», — сказаў Лукашэнка.
Дзіяна Панчанка — грамадзянка Украіны, працавала вядоўцай на тэлеканалах кума Пуціна Віктара Медведчука. Улетку 2022 года яна з’ехала з Украіны. У студзені гэтага года СБУ завяла на яе крымінальную справу праз яе паездку ў акупаваныя Данецк і Марыупаль для здымак «прапагандысцкага рэпартажу». Уключаная ў санкцыйны спіс Украіны за заявы «ў поўнай адпаведнасці з тэзісамі расійскай прапаганды і поўныя антыўкраінскага зместу».