У канцы чэрвеня Палата прадстаўнікоў сёмага склікання закрыла сваю дзявятую сесію, якая доўжылася з 20 верасня 2022 года. А ў жніўні заканадаўчы орган апублікаваў справаздачу пра сваю працу за апошні год. У 276-старонкавым дакуменце расказваецца пра прынятыя законапраекты, міжнародную дзейнасць дэпутатаў, выязныя паседжанні і гэтак далей. Мы ўсё гэта апісваць не будзем — раскажам толькі, наконт чаго да дэпутатаў звярталіся грамадзяне і чым парламент пасля года працы больш за ўсё ганарыцца.
Звароты
Парламент з верасня да чэрвеня правёў 32 паседжанні, разгледзеў 116 пытанняў і прыняў 56 законапраектаў у першым і 101 у другім чытанні, 189 пастановаў.
У акругах дэпутаты прынялі 6367 выбаршчыкаў, у кожнага з якіх было нейкае пытанне, а таксама правялі 3223 мерапрыемствы накшталт жывых тэлефонных ліній. Акрамя таго, парламентарыі зладзілі 6175 сустрэч у працоўных калектывах.
За другую палову 2022-га і першую палову 2023 года Палата прадстаўнікоў атрымала 1008 зваротаў ад грамадзян і юрыдычных асобаў.
Нагадаем, у парламенце мусіць быць 110 чалавек, аднак цяпер тры крэслы пустуюць. Дэпутаты, якія займалі іх, памерлі:
- 5 кастрычніка 2020 года памёр Леанід Пісанік (43-я Палеская акруга, Ельск);
- 14 траўня 2021 года памёр Ігар Лаўрыненка (61-я Бярэзінская акруга, Беразіно);
- 7 сакавіка 2023-га памёр Андрэй Злотнікаў (33-я Гомельская цэнтральная акруга).
Улады так і не правялі перавыбары, хоць гэта абавязкова, калі да канца паўнамоцтваў засталося больш за год. Жыхары гэтых акругаў (195 тыс. чалавек) застаюцца без прадстаўніка ў парламенце — накіроўваць звароты ім няма каму.
Такім чынам, на аднаго дэпутата прыпала менш за дзесяць зваротаў за год.
Больш чым 90% зваротаў паступілі ў пісьмовай форме. Кожны трэці — па электроннай пошце. 86 з тысячы былі калектыўнымі.
Актыўней за ўсё лісты дэпутатам пісалі мінчукі — са сталіцы паступіла 45,2% зваротаў. На другім месцы па актыўнасці — Віцебская вобласць (15,6%), на трэцім — Мінская (10,3%), потым ідуць Брэсцкая і Магілёўская (больш за 7%), а менш за ўсё на дэпутатаў спадзявалася Гродзеншчына — толькі 4,2%. Акрамя таго, 25 зваротаў паступіла з-за мяжы.
Большасць зваротаў утрымлівала прапановы што да карэктавання заканадаўства (263) або была звязаная з тлумачэннем прававых нюансаў (151). Аўтары лістоў прапаноўвалі змены ў:
- Кодэкс аб адміністрацыйных правапарушэннях, выбарчы, падатковы, аб шлюбе і сям'і і іншыя кодэксы;
- законы аб Усебеларускім народным сходзе, аб грамадзянстве, палітычных партыях, мясцовым самакіраванні, аб амністыі да Дня народнага адзінства, законы па пытаннях аўтарскага права, прадпрымальніцтва, вайсковай службы, пенсій, абыходжання з жывёламі, ЖКГ, аховы навакольнага асяроддзя і селекцыі сельскагаспадарчых раслін і іншыя законы.
Было каля 50 скаргаў па пытаннях ЖКГ, дарог, тарыфаў, 34 — па пытаннях пенсійнага забяспечання, сямейнага капіталу, 24 — медыцынскіх паслуг.
Наступнай па папулярнасці тэмай стала дзейнасць сілавых структур. 23 звароты датычылі МУС і столькі ж — судоў (у іх падымалася пытанне законнасці прынятых рашэнняў), шэсць — абароны і столькі ж — пракуратуры, адзін — органаў следства. Усяго адзін зварот паступіў па пытаннях гандлю і тры — па пытаннях навакольнага асяроддзя.
Самі дэпутаты разгледзелі 69% зваротаў, астатнія пытанні былі вырашаныя на ўзроўні сакратарыята парламента.
Міжнародныя кантакты
«У перыяд дзявятай сесіі дэпутаты ўзялі актыўны ўдзел у рэалізацыі знешнепалітычнага курсу краіны, прасоўванні ў міжнароднай парламенцкай супольнасці мірнай, аб’яднальнай павесткі», — гаворыцца ў справаздачы.
Дэпутаты здзейснілі мноства міжнародных сустрэч, правялі перамовы з калегамі з розных краін — такіх як Венесуэла, Інданезія, Калумбія, Лаос, Мексіка, Судан, Палестына і нават КНДР. Асабліва шмат мерапрыемстваў прайшло з Іранам, Кітаем, Кубай. Лёталі і самі: у Азербайджан, Кітай, Турцыю, Узбекістан.
Зрэшты, большасць візітаў дэпутатаў на розныя мерапрыемствы была ў Расію.
Але адбылося сёлета і некалькі анлайн-сустрэч з асобнымі прадстаўнікамі краін Еўропы — пра кожную ў справаздачы расказваецца падрабязна.
- Польшча
19 красавіка дэпутат Алег Гайдукевіч і некалькі ягоных калегаў сустрэліся з польскім «публіцыстам, пісьменнікам, аналітыкам, блогерам» Томашам Грыгучам. Як гаворыцца ў справаздачы, гэта «адзін з многіх еўрапейцаў, якія выступаюць за сапраўдную самастойнасць Еўропы», ён перакананы ў неабходнасці наладжвання адносін Польшчы з Беларуссю і «з вялікай павагай ставіцца» да палітыкі Аляксандра Лукашэнкі. Бакі сышліся ў меркаванні, што «Еўропа будзе моцнай і будзе квітнець толькі разам з Беларуссю, калі будзе мір, а Еўропа стане па-сапраўднаму незалежнай».
23 траўня прайшла анлайн-сустрэча дэпутата Аляксандра Сангіна, кіраўніка афіцыйнага «Саюза палякаў на Беларусі», з лідарам польскай прарасійскай партыі «Фронт» Кшыштафам Талвіньскім. А ўжо 9 чэрвеня намесніцу старшыні гэтай партыі Галіну Данзіла прымаў у парламенце ў Мінску дэпутат Андрэй Савіных. Яны абмяркоўвалі адносіны Беларусі і Польшчы, сітуацыю ў Еўропе і «спосабы зніжэння напружання і ўрэгулявання рэгіянальных канфліктаў».
Партыю «Фронт» у Польшчы зарэгістравалі толькі ў сакавіку гэтага года, у парламент яна не ўваходзіць. Гэта прарасійская партыя, якая выступае за партнёрства з РФ і Беларуссю і «дэўкраінізацыю Польшчы», «вызваленне з-пад пратэктарату ЗША». Яе лідар Талвіньскі ў канцы нулявых два месяцы быў намеснікам міністра фінансаў, а потым два гады — дэпутатам польскага Сейма.
- Малдова
22 чэрвеня прайшла сустрэча кіраўніка рабочай групы Палаты прадстаўнікоў па супрацоўніцтве з парламентам Малдовы Мікалая Васількова з кіраўніцай парламенцкай групы сяброўства з Беларуссю ў парламенце Малдовы Аленай Беляковай. На сустрэчы «аднаўлялі напрацоўкі і надавалі ім новы імпульс».
- Партугалія
Дэпутат Сяргей Клішэвіч 20 студзеня правёў анлайн-сустрэчу з дэпутатам Еўрапарламента, прадстаўніком Партугальскай камуністычнай партыі Жуау Піментай Лопесам. Той «выказаў падтрымку палітычнаму курсу нашай краіны і асудзіў санкцыйны ціск калектыўнага захаду на Беларусь», а таксама заявіў, што ягоная партыя абараняе мір у Партугаліі і выступае за сяброўства з Расіяй і Беларуссю. 20 красавіка Клішэвіч сустрэўся з яшчэ адным сябрам гэтай партыі — Матэвушам Алвесам Хасэ Анхела. Той «пацвердзіў салідарнасць з Беларуссю ў справе супрацьстаяння заходнім санкцыям і несправядлівым ідэям капіталізму».
Галоўныя заслугі
У справаздачы парламента пералічваюцца тыя вынікі працы, якімі дэпутаты асабліва ганарацца. На іх думку, яны наступныя.
- Паглыбленая інтэграцыя з Расіяй ідзе паспяхова
Дэпутаты ажыццяўлялі заканадаўчае суправаджэнне і кантроль за рэалізацыяй 28 саюзных праграм з Расіяй.
«Цяпер з упэўненасцю можна казаць, што дзякуючы прынятым мерам саюзнае будаўніцтва выходзіць на якасна новы ўзровень», — запэўніваюць аўтары справаздачы.
- Ізаляваць Беларусь у Захаду не атрымалася
«Інтэнсіўнасць двухбаковых кантактаў, геаграфія супрацоўніцтва і гатоўнасць большасці краін свету развіваць з Рэспублікай Беларусь узаемавыгадныя адносіны красамоўна сведчаць пра тое, што планы Захаду ізаляваць нас ад сусветнай супольнасці праваліліся», — гаворыцца ў дакуменце.
Больш за тое, падкрэсліваецца, што становішча Беларусі нават умацавалася: яна ўступіла ў ШАС (Шанхайскую арганізацыю супрацоўніцтва).
- Утрымалі эканоміку
«Своечасова прыняты шэраг дзейсных мер, скіраваных на павышэнне супраціўляльнасці нацыянальнай эканомікі знешнім шокам, забяспечанне яе дынамічнага развіцця і звядзенне да мінімуму негатыўнага ўплыву санкцый на паўсядзённае жыццё беларускіх грамадзян», — адзначае Палата прадстаўнікоў.
З саміх мераў названае толькі ўвядзенне абмежаванняў для кампаній, у якіх ёсць акцыянеры з «недружалюбных» краін, прыняцце законаў па пытаннях канфіскацыі маёмасці, перадачы кампаній пад часовае знешняе кіраванне.
- Забяспечылі нацыянальную бяспеку
«Павышаныя статус і роля органаў дзяржаўнай бяспекі. Узмоцненая крымінальная адказнасць за здзяйсненне злачынстваў экстрэмісцкай, тэрарыстычнай і антыдзяржаўнай скіраванасці. Знакавым стала таксама прыняцце Закона „Аб народным апалчэнні“», — гаворыцца ў справаздачы.
- Адстаялі гістарычную праўду
«Самую жорсткую пазіцыю дэпутаты занялі ў пытаннях адстойвання гістарычнай праўды, захавання пераемнасці пакаленняў, нацыянальнай ідэнтычнасці і традыцыйных духоўна-маральных каштоўнасцяў», — падкрэсліваецца ў дакуменце.
Пад гэтымі словамі хаваецца прыняцце паправак у заканадаўства, дзякуючы якім можна «больш эфектыўна даследаваць абставіны генацыду беларускага народа» і судзіць за яго мёртвых.
Чытайце таксама
