Паводле інфармацыі аб’яднання былых сілавікоў BELPOL, «Белаэранавігацыя», якая займаецца кіраваннем і арганізацыяй паветранага руху, знаходзіцца ў глыбокім крызісе. Дзяржпрадпрыемства нават папрасіла сродкі з бюджэту для выплаты зарплаты. Крыніца «Люстэрка» ў кампаніі пацвердзіла: фінансавыя цяжкасці пачаліся даўно, а заробкі супрацоўнікаў за апошнія гады значна знізіліся. Расказваем падрабязнасці.
«Белаэранавігацыя» — дзяржаўнае ўнітарнае прадпрыемства, займаецца аказаннем дыспетчарскіх паслуг для самалётаў, што знаходзяцца ў паветранай прасторы Беларусі, таксама ў яго падпарадкаванні знаходзяцца аэрапорты ва ўсіх абласных гарадах, акрамя Мінска.
Раней кампанія ўваходзіла ў спіс высокарэнтабельных прадпрыемстваў, якія мусяць пералічваць 20% ад свайго прыбытку ў бюджэтны фонд нацыянальнага развіцця. У 2020 годзе сума, выплачаная ў гэты фонд «Белаэранавігацыяй», склала 3,9 млн рублёў. То-бок яе прыбытак за 2019 год складаў прыкладна 19,5 млн рублёў.
У 2021 годзе ў арганізацыі пачаліся праблемы. Пасля пасадкі ў Мінску самалёта Ryanair у Беларусь перасталі лётаць авіякампаніі краін Захаду, транзітныя палёты праз тэрыторыю краіны таксама трапілі пад забарону. У ліпені 2021 года супраць «Белаэранавігацыі» былі ўведзеныя санкцыі. Увосень 2021 года кіраўнік Дэпартамента авіяцыі Мінтранса Арцём Сікорскі заяўляў, што страчаная выгада прадпрыемства праз санкцыі складае блізу 10 млн даляраў штомесяц.
У тым жа годзе кампанія падала пазоў у Еўрапейскі суд аб выключэнні яе з гэтага спісу. Але ў 2023-м суд адхіліў яго.
BELPOL: «Самастойна выбрацца з фінансавай катастрофы прадпрыемства не ў стане»
Прадстаўнік BELPOL Уладзімір Жыгар паведаміў «Люстэрку», што інфармацыю пра кепскае становішча «Белаэранавігацыі» аб’яднанне былых сілавікоў атрымала ад крыніцы з авіяцыйнай галіны Беларусі.
Паводле інфармацыі BELPOL, для таго каб выплаціць заробкі калектыву амаль на 2000 чалавек, кіраўніцтва «Белаэранавігацыі» звярнулася да Аляксандра Лукашэнкі. Яны просяць вылучыць 3 млн рублёў толькі сёлета. Зыходзячы з дакумента, які ёсць у распараджэнні аб’яднання былых сілавікоў (з ім азнаёмілася «Люстэрка»), грошы прапануюць узяць са спецыяльнага рэспубліканскага фонду грамадзянскай авіяцыі, які з’явіўся ў 2020-м.
Таксама ў дакуменце ўдакладняецца, што калі ў 2020 годзе над Беларуссю за суткі пралятала 600 авіялайнераў, то пасля прымусовай пасадкі самалёта Ryanair і санкцый у дачыненні да беларускай авіягаліны колькасць палётаў знізілася да 250 за суткі. Гэтая лічба паменшылася да 100 пасля пачатку поўнамаштабнай вайны Расіі супраць Украіны. Акрамя таго, аказваецца, што пяць аэрапортаў у абласных цэнтрах Беларусі, якія з’яўляюцца філіяламі «Белаэранавігацыі», цяпер працуюць у рэжыме запасных аэрадромаў для Нацыянальнага аэрапорта Мінск. Палётаў цывільных суднаў з іх не адбываецца.
У выніку, гаворыцца ў дакуменце, гэта прывяло да атрымання «Белаэранавігацыяй» стратаў — летась яны склалі 19 млн рублёў, а ў першым квартале гэтага — 6 млн рублёў.
— Істотная доля выдаткаў «Белаэранавігацыі» — гэта заробак персаналу, тэхнічнае абслугоўванне абсталявання, утрыманне будынкаў і збудаванняў. Яны носяць пастаянны характар і не залежаць ад аб’ёмаў аказаных паслуг. Улічваючы гэта, самастойна выбрацца з фінансавай катастрофы прадпрыемства не ў стане, — лічыць прадстаўнік BELPOL Уладзімір Жыгар.
Супрацоўнік «Белаэранавігацыі»: «Заробак знізіўся ў 2−3 разы»
«Люстэрка» паразмаўляла з беларусам, які працуе ў «Белаэранавігацыі», і ён пацвердзіў, што ў прадпрыемства сапраўды фінансавыя цяжкасці.
Паводле словаў Пятра (імя суразмоўцы змененае), зарплаты ў арганізацыі пакуль выплачваюць своечасова, але іх не індэксавалі ўжо некалькі гадоў, зменшыліся штомесячныя прэміі:
— Фактычны заробак упаў у 2−3 разы з улікам росту цэн і курсу даляра. Зменшылі сацыяльныя выплаты, якія былі пазначаныя ў калектыўнай дамове.
Пётр таксама пацвердзіў «Люстэрку» зніжэнне колькасці самалётаў, абслугоўванне якіх ажыццяўляе «Белаэранавігацыя»:
— Да пандэміі каранавіруса, увядзення санкцый і пачатку вайны ва Украіне за суткі мы абслугоўвалі каля 1000 рэйсаў (год таму ў інтэрв'ю расійскаму агенцтву «Спутник» начальнік дыспетчарскага цэнтра кіравання палётамі ў Мінску казаў, што да кавіду яны абслугоўвалі 1200−1300 рэйсаў у суткі. — Заўв. рэд.). Цяпер добра, калі набярэцца 100 самалётаў за дзень, а зімой будзе нават менш.
Значная частка выдаткаў «Белаэранавігацыі», кажа Пётр, прыпадае на ўтрыманне і абслугоўванне аэрапортаў у пяці абласных гарадах Беларусі, якія з’яўляюцца філіяламі кампаніі:
— Усе абласныя аэрапорты стратныя, там ёсць праблема з персаналам, работнікаў не хапае і яны з цяжкасцю выконваюць функцыі запасных аэрадромаў.
Паводле суразмоўцы, з праблемамі кіраўніцтва «Белаэранавігацыі» змагаецца з дапамогай скарачэння супрацоўнікаў:
— Персанал аптымізуюць пакуль за кошт пенсіянераў, у якіх заканчваецца кантракт, але шмат дэфіцытных і пісьменных спецыялістаў звальняюцца самі з фінансавых меркаванняў.
Чытайце таксама
