Дыпламатычны скандал разгарэўся паміж Беларуссю і Швецыяй — у Мінск адклікалі беларускага амбасадара, для кансультацый у Стакгольм таксама адклікалі шведскага часовага паверанага ў Беларусі, паведамляе Радыё «Свабода».
Скандал разгарэўся праз прызначэнне Крысціны Юханесан, якая раней была амбасадаркай Швецыі ў Беларусі, прадстаўніцай Швецыі пры беларускай дэмакратычнай супольнасці за мяжой.
Як паведамілі Радыё «Свабода» ў прэс-службе МЗС Швецыі, «цяпер у Стакгольме для кансультацый знаходзіцца часовы павераны ў справах Швецыі ў Мінску. Праца ў амбасадзе Швецыі ў Мінску працягваецца ў звычайным рэжыме. Цяпер у Мінску для кансультацый знаходзіцца амбасадар Беларусі ў Стакгольме».
У знешнепалітычным ведамстве Швецыі выданню таксама паведамілі, што пасля новага прызначэння Крысціны Юханесан МЗС Швецыі правяло перамовы з беларускімі прадстаўнікамі.
«У нас няма канкрэтных рэакцый, каб падзяліцца», — паведамілі ў прэс-службе МЗС Швецыі.
Амбасадарам Беларусі ў Швецыі працуе Дзмітрый Мірончык.
На сайце МЗС Швецыі і ў сацсетках ведамства пра гэта не згадваецца. МЗС Беларусі і дзяржаўная прэса таксама пра гэта не паведамлялі.