Літва ўслед за Польшчай і Латвіяй перастала прапускаць у Беларусь аўтамабілі на транзітных нумарах з рухавіком больш за 1,9 літра і даражэйшыя за 50 тысяч еўра. Пра гэта ў профільных чатах пішуць аўтамабілісты, якія захраслі перад літоўска-беларускай мяжой. Таксама пра гэта паведамляе Instagram-акаўнт bolshoi_autoblog.
Нагадаем, 23 сакавіка на польскай мяжы пачалі разварочваць аўто на транзітных нумарах з рухавіком ад 1,9 літра і даражэйшыя за 50 тысяч еўра, перагоншчыкі машын паехалі на пункты пропуску ў Літву і Латвію. З 26 сакавіка ў адзіным на мяжы з Беларуссю латвійскім пункце пропуску «Патэрніекі» таксама ўвялі забарону, аналагічную польскай.
Да 29 сакавіка пункты пропуску Літвы заставаліся адзінымі, праз якія аўтамабілі на транзітах маглі трапіць у Беларусь. Праз гэта перад мяжой утварыліся вялікія чэргі. У профільных чатах аўтамабілісты паведамлялі, што чарга практычна не рухаецца. На праходжанне мяжы ў людзей, якія ехалі на машынах і не мелі прыярытэту на першачарговы праезд, ішло прыкладна 20−36 гадзін. Таксама прасоўванне затрымлівалася праз тое, што ў чаргу ўкліньваліся «транзітнікі», якія спяшаліся ў Беларусь, думаючы, што літоўскі бок таксама забароніць ім праезд.
29 сакавіка каля 2.00 у тэлеграм-канале «Каменный Лог-Мядининкай и Бенякони -Шальчининкай»
паведамілі, што ўсе аўто з маторам 1,9 літра і электракары на транзітах «адставілі ў бок» — іх перастаў прапускаць літоўскі бок.
«На шлагбаўме сказалі перадаць чарзе, каб не заязджалі транзіты, будзе разварот. Стаяць чакаць дазволу. Іншым сказалі аб’язджаць іх», — напісалі раніцай у тэлеграм-канале.
Мяркуючы з паведамленняў, аўтамабілі на транзітных нумарах цяпер стаяць перад мяжой, спадзеючыся, што сітуацыя нармалізуецца і іх аформяць для праезду ў Беларусь.
«Страшная сітуацыя, людзі купілі машыны легальна і не могуць выехаць. Калі ўжо перакрываеце, то папярэдзьце загадзя. Я думаю, у транзіту адзін шлях цяпер — праз якую-небудзь Малдову і паромам дадому», — адрэагаваў на забарону ўдзельнік чата.
Пра тое, што літоўцы таксама ўвялі абмежаванні для аўто, якія едуць у Беларусь, паведаміў і bolshoi_autoblog. «Літва таксама закрыла праезд машын аб’ёмам вышэй за 1,5 літра (напісаны менавіта такі аб’ём. — Заўв. рэд.). Экспартныя дэкларацыі анулююць, машыны разварочваюць», — адзначыў bolshoi_autoblog.
Адзначым, што ўсе тры краіны не паведамілі афіцыйна пра прычыну, з якой забаронена прапускаць аўто ў Беларусь. Нагадаем, раней беларуская мытня заявіла, што чула пра новаўвядзенне з боку Польшчы і Латвіі, але афіцыйных паведамленняў у ведамстве не атрымлівалі.
У латвійскім пункце пропуску «Патэрніекі» раней адзначалі, што абмежаванні звязаныя з санкцыямі на ўзроўні ЕС.
Паводле звестак расследавальнікаў праекта «Бюро», Польшча ўваходзіць у топ-3 краін ЕС, з якіх у нашую краіну трапляе больш за ўсё аўто. Так, на фоне вайны пастаўкі машын з ЕС у Беларусь падскочылі ў чатыры разы — амаль да 1,5 млрд еўра, а летась перавысілі 1,7 млрд еўра, адзначаюць расследавальнікі са спасылкай на звесткі Еўрастата. Больш за ўсё аўтамабіляў у нашую краіну прадаюць Германія, Літва і Польшча. Толькі за дзевяць месяцаў мінулага года з трох краін у Беларусь вывезлі амаль 60 тысяч машын. На фоне вайны Беларусь стала перавалачнай базай для паставак люксавых аўтамабіляў на дзясяткі мільёнаў даляраў у Расію, нягледзячы на байкот і санкцыі, перакананыя расследавальнікі.
Чытайце таксама
