Лідарка беларускіх дэмакратычных сіл Святлана Ціханоўская назвала тры магчымыя сцэнары пераменаў у Беларусі. Яна загаварыла пра гэта падчас лекцыі пра рэгіянальную стабільнасць і бяспеку ва ўніверсітэце Вітаўта Вялікага ў Каўнасе, паведамляе «Позірк».
Палітык адразу агаварылася, што «сёння складана прадказаць, як будзе развівацца сітуацыя».
Ціханоўская лічыць, што паводле першага сцэнара, які прадугледжвае перамогу Украіны ў развязанай супраць яе Расіяй вайне, «Беларусь атрымлівае яшчэ адзін гістарычны шанец».
— Чым слабейшы [прэзідэнт РФ Уладзімір] Пуцін, тым слабейшы [Аляксандр] Лукашэнка. Без падтрымкі Расіі рэжым Лукашэнкі не зможа ўтрымаць уладу, што адкрывае для нас акно магчымасцяў. Таму дапамога Украіне для перамогі ў вайне — наш нацыянальны інтарэс, — канстатавала яна.
Другі сцэнар прадугледжвае «кампраміс або ўгоду з Пуціным, якая замарозіць канфлікт», і такога развіцця падзей, паводле Ціханоўскай, «пажадана пазбегнуць».
— У такой сітуацыі ёсць рызыка, што ў Беларусі захаваецца статус-кво, і яна застанецца пад кантролем Расіі. У абодвух дыктатараў з’явіцца час, каб умацаваць сваю ўладу і падрыхтавацца да новага нападу. Такі сцэнар небяспечны не толькі для беларускай незалежнасці, але і для міру ў рэгіёне, — папярэдзіла палітык.
Трэці сцэнар прадугледжвае надыход перамен у Беларусі да перамогі Украіны. Ціханоўская падкрэсліла, што «рэжым Лукашэнкі значна менш стабільны, чым здаецца».
— Мы не ведаем, што можа паслужыць штуршком: эканамічны крызіс, незадаволенасць насельніцтва ці раскол элітаў, — заявіла яна. — Нават адсутнасць дыктатара цягам нейкага часу стварае вакуум улады і паралізуе сістэму. Такія змены могуць стаць пераломным момантам.
Лідарка дэмсіл падкрэсліла, што «ва ўсіх трох сцэнарах існуе мноства пераменных».
— Мы не ведаем, як і калі адбудуцца перамены. Але мы мусім быць гатовыя скарыстацца магчымасцю, калі яна з’явіцца, — дадала яна.
