Урад 21 траўня дапоўніў спіс тавараў, якія забаронена ўвозіць і прадаваць у Беларусі. Абмежаванні датычаць некаторых «недружалюбных» краін — Латвіі, Літвы, Польшчы, Чэхіі і Эстоніі. МЗС пракаментавала гэтае рашэнне.
«Беларускі бок з вялікім шкадаваннем канстатуе спробы названых краін ЕС стаць лідарамі заходняга антыбеларускага парадку дня. Такая лінія на разбурэнне прыязных сувязяў паміж народамі нашых краін, бесперапыннае вынаходніцтва новых абмежаванняў, распаўсюд дэзінфармацыі наконт рэальнай сітуацыі ў Беларусі не паддаецца тлумачэнню. І гэта не толькі эканамічныя рэстрыкцыі. Гаворка ідзе пра абмежаванне свабоды перамяшчэння людзей і тавараў, забароны на выплаты пенсій і аліментаў, незаконную канфіскацыю грузаў і замарозку актываў за кошт пашыральнага тлумачэння санкцый, пагрозы нацыяналізацыі беларускай дзяржуласнасці. У гэтым шэрагу — падрыхтоўка баевікоў і сілавых сцэнараў неканстытуцыйнага перавароту ў нашай краіне, абмежаванні на вяшчанне беларускіх СМІ, завядзенне крымінальных справаў супраць уласных грамадзян, якія станоўча адклікаюцца пра Беларусь», — заявілі ў прэс-службе Міністэрства.
У МЗС лічаць, што «ўся гэтая вакханалія адбываецца з маўклівай згоды большасці краін — сябраў ЕС, прадстаўнікі якіх проста падпісваюць чарговыя антыбеларускія дэмаршы, падрыхтаваныя „прызнанымі спецыялістамі па Беларусі“ з Вільнюса і Варшавы, да якіх дадаліся „эксперты“ з Рыгі, Прагі і Таліна».
«Чарговым разам адзначаем бесперспектыўнасць любых санкцыйных мер. Разлічваем, што краіны ЕС надалей будуць цвяроза і ўзважана ацэньваць інфармацыю сваіх партнёраў пра нібыта пагрозы, якія ідуць ад Беларусі, і прыйдуць да разумення безальтэрнатыўнасці вяртання да дыялогу з Мінскам у інтарэсах стабільнасці і бяспекі ўсяго рэгіёна», — падсумавалі ў МЗС.
Раней ва ўрадзе заявілі, што гэтыя абмежаванні ўводзяць як адказ на прынятыя гэтымі дзяржавамі санкцыі. Так, Латвіі Мінск прыгадаў забарону на імпарт з Беларусі харчовай прадукцыі па асобных пазіцыях, Літве — забарону на адзін год увозу сельскагаспадарчай прадукцыі і кармоў з Беларусі.
