Калі б Аляксандр Лукашэнка камандаваў Узброенымі сіламі Украіны, то Расія даўно б завяршыла вайну, заявіў Уладзімір Пуцін 28 траўня, адказваючы на пытанні супрацоўнікаў дзяржаўных СМІ ва Узбекістане.
— На жаль, пакуль Аляксандр Рыгоравіч вайскоўцамі ва Украіне не камандуе. Калі б камандаваў, мы б даўно завяршылі гэты канфлікт. Прычым з узаемным задавальненнем. Мы б знайшлі развязкі з Украінай, — сказаў Уладзімір Пуцін.
Падчас размовы са СМІ ва Узбекістане расійскі лідар таксама заявіў, што, «паводле папярэдняй ацэнкі», адзінай легітымнай уладай ва Украіне застаюцца парламент і спікер Вярхоўнай рады.
Падобныя заявы ён рабіў і раней. Так, напрыклад, 24 траўня на прэс-канферэнцыі ў Мінску Уладзімір Пуцін адзначыў, што, на ягоную думку, легітымнасць прэзідэнта Украіны Уладзіміра Зяленскага «скончылася». У Кіеве гэтыя выказванні назвалі «сумнымі».
— Украінцы ведаюць сваю Канстытуцыю, ведаюць законы. Разумеем, што гэтыя выказванні нелегітымнага прэзідэнта Расійскай Федэрацыі з нагоды нелегітымнасці прэзідэнта Украіны, шчыра кажучы, сумныя. Нецікавыя. Усе адэкватныя людзі, якія ўмеюць чытаць законы… прачытаюць і знойдуць выснову. Таму мяне гэта, шчыра кажучы, не моцна турбуе, — сказаў прэзідэнт Украіны Уладзімір Зяленскі ў інтэрв'ю незалежным медыя краін Цэнтральнай Азіі.
Чытайце таксама
