На асабістую просьбу старшыні КДБ Івана Церцеля для спецслужбістаў пачалі будаваць спецыяльны медцэнтр. Згодна з дакументамі, якія з дапамогай BELPOL атрымаў праект Digital intelligence team, на будаўніцтва і абсталяванне цэнтра збіраюцца выдаткаваць больш за 15 мільёнаў даляраў «спонсарскіх» сродкаў. Расказваем.
Digital intelligence team — беларускі расследавальніцкі праект, публікуе інфармацыю пра прадстаўнікоў улады і сілавікоў.
З просьбай пабудаваць медцэнтр у Мінску кіраўнік КДБ звярнуўся да тагачаснага міністра аховы здароўя Дзмітрыя Піневіча 9 лістапада 2023 года. Матываваў ён гэта тым, што супрацоўнікі і ветэраны КДБ (а таксама іх сем'і) маюць патрэбу ў «павышэнні якасці аказання медыцынскай дапамогі». Будаваць новы будынак меркавалася на ўчастку, які належыць Вайскова-медыцынскаму ўпраўленню КДБ.
Прапанову ўхвалілі за тры дні. Ужо 11 лістапада 2023 года Піневіч падпісаў загад пра ўзвядзенне «будынка спецыялізаванай аховы здароўя і сацыяльных паслуг». Заказчыкам выступіла РУП «Дырэкцыя будаванага прадпрыемства Міністэрства аховы здароўя».
Пляцоўку выбралі каля амбулаторнага цэнтра Вайскова-медыцынскага ўпраўлення КДБ у Мінску па адрасе: вул. Макаёнка, 13.
Цікава, што ў якасці крыніцы фінансавання праекта міністр паказвае «спонсарскія сродкі». Хто канкрэтна стаў гэтым «спонсарам», у дакуменце не ўдакладняецца.
Пад цэнтр для КДБ аддалі ўчастак на 0,47 га. У медцэнтры тры паверхі (адзін падземны), яго агульная плошча — 1980 м2.
Будаўніцтва пачалося ў красавіку 2024 года. Скончыць збіраліся ў снежні таго ж года, але, паводле звестак «Люстэрка», працы яшчэ ідуць.
Агульная сума выдаткаў на ўзвядзенне будынка, паказаная ў каштарысе, — 31,7 мільёна рублёў, або 9,75 мільёна даляраў (тут і далей сумы ў пераліку паводле сярэднегадавога курсу Нацбанка за 2024 год). Але сюды не ўваходзяць выдаткі на абсталяванне медцэнтра.
Згодна з планам, акрамя памяшкання для гардэроба, аховы, трох пакояў адпачынку і канферэнц-залы, у будынку будуць:
- працэдурны пакой МРТ;
- працэдурны пакой КТ;
- працэдурны пакой мамаграфіі;
- працэдурны пакой РК. Конусна-прамянёвая тамаграфія;
- пакой экстраннай дапамогі;
- кабінет ЭКГ;
- два кабінета ультрагукавой дыягностыкі;
- кабінет электранейраміяграфіі (гэта сучасны метад інструментальнай дыягностыкі, які дазваляе вызначыць скарачальную здольнасць цягліц і стан нервовай сістэмы).
Колькі каштуе тэхніка для медцэнтра сілавікоў?
Самым дарагім набыццём стаў магнітна-рэзанансны тамограф Ingenia Elition X. Ён выраблены нідэрландскай кампаніяй Philips Medical Systems Nederland. З размытненнем і падаткамі ён абышоўся ў 12,75 мільёна рублёў. Яго купілі ў эстонскай кампаніі MED S&P AS, звязанай з нейкім 33-гадовым Дзмітрыем Крылянковым.
MED S&P AS у асноўным і пастаўляла абсталяванне для медцэнтра. Да прыкладу, яна ж прадала тамограф Incisive CT за 900 тысяч еўра. А таксама камплект ультрагукавых дыягнастычных апаратаў з прыладамі і расходнымі матэрыяламі AFFINITI 70 за 130 тысяч еўра (гэта сума без ПДВ і размытнення). І інжэктары для ўвядзення рэнтгенакантрасных прэпаратаў з прыладамі за 35 тысяч еўра.
Акрамя эстонскай кампаніі сярод пастаўшчыкоў фігуруе і кампанія «АДВИН Смарт Фэктори». За рэнтгенаўскі мамаграфічны апарат заплацілі 649 тысяч рублёў з ПДВ. Прычым на сайце дзяржзакупак звесткі пра яго схаваныя.
Усяго, паводле атрыманай даследчыкамі ведамасці, на медыцынскае абсталяванне выдаткавалі 20 мільёнаў рублёў — гэта 6,42 мільёна даляраў. Выходзіць, што ўвесь цэнтр абышоўся загадкавым спонсарам мінімум у 52 мільёны рублёў, або 15 мільёнаў даляраў.
Чытайце таксама
