Следчы камітэт распачаў крымінальную справу «па факце арганізацыі дзеянняў, якія груба парушаюць грамадскі парадак у Гомелі» — гаворка ідзе пра сустрэчу падлеткаў з «ПВК Родан», падчас якой затрымалі 200 чалавек. Пра гэта паведамляе прэс-служба ведамства.
«Паводле звестак следства, 28 лютага гэтага года, паддаўшыся заклікам, апублікаваным у сацыяльных сетках і мэсэнджарах, каля гандлёвага цэнтра „Сакрэт“ у Гомелі скааперавалася група маладых людзей з 200 чалавек ва ўзросце ад 13 да 21 года, аб’яднаныя агульнымі поглядамі і прыналежнасцю да розных моладзевых субкультураў, у тым ліку „ПВК Родан“ і так званых „каляфутбольных рухаў“», — гаворыцца ў паведамленні.
Ва ўстанове нагадалі, што аналагічныя зборы падлеткаў з «ПВК Родан» ва Украіне і Расіі «заканчваліся беспарадкамі і масавымі бойкамі ў грамадскіх месцах».
У СК адзначылі, што збор падлеткаў быў «незаконным масавым мерапрыемствам», таму дзяцей затрымала міліцыя, з 200 затрыманых, 183 аказаліся няпоўнагадовымі.
Распачатая крымінальная справа па арт. 342 (Арганізацыя і падрыхтоўка дзеянняў, якія груба парушаюць грамадскі парадак) КК Беларусі. Асобы арганізатараў масавага збору высвятляюць.
«У папулярных сярод новага пакалення сацыяльных сетках працягваюць з’яўляцца публікацыі з заклікамі да несанкцыянаваных масавых мерапрыемстваў у розных гарадах Беларусі. Не паддавайцеся на правакацыі. Усе спробы парушэння грамадскага парадку будуць актыўна і строга спыняцца праваахоўнымі органамі, а ўдзельнікі такіх мерапрыемстваў будуць абавязкова прыцягнутыя да ўстаноўленай законам адказнасці, аж да крымінальнай», — прыгразілі ў СК.
Нагадаем, 28 лютага падлеткі, якія маюць дачыненне да нефармальнага анімэ-руху «Родан», сабраліся ля ГЦ «Сакрэт» у Гомелі. Разрозненыя групы дзяцей хутка затрымалі — агулам 200 чалавек. У МУС заявілі, што падлеткаў, якім яшчэ не споўнілася 16 гадоў, паставяць на ўлік у інспекцыю па справах няпоўнагадовых. Тых, хто старэйшы, будуць прыцягваць да адміністрацыйнай адказнасці.