Журналістка з Мінска Марыя Грыц і былая ўладальніца гарадзенскай крамы «Адметнасць» Вольга Верамеенка, якія цяпер жывуць у Беластоку, стварылі гародзікі на балконах і расказалі «Зялёнаму парталу», як правільна гэта рабіць.
— Сёлета ўжо другі мой агародны сезон. Распачала яго летась, калі мы прыехалі ў Беласток і зразумелі, дзе мы будзем жыць, — распавядае Марыя Грыц, якая спачатку з’ехала з Беларусі ў Грузію, адтуль — ва Украіну, а пасля пачатку вайны пераехала ў Польшчу. — Была акурат вясна. І вось у мяне кожную вясну нейкая ломка пачынаецца — мне трэба саджаць агарод.
Вельмі хацелася адчуваць нейкі кантроль хоць над чымсьці. А тут усё зразумела: пасадзіла сунічку — у цябе сунічка і вырасла. Ну наўрад ці калі ты пасадзіш суніцу, у цябе вырасце гарбуз.
Вольга Верамеенка кажа, что ўсё жыццё займалася раслінамі, а па першай адукацыі аграном і доўгі час выкладала ў аграрным каледжы. Калі жанчына трапіла ў вымушаную эміграцыю, то вельмі сумавала па сваіх раслінах, а потым стварыла ўласны гарод і нават вырошчвае бульбу — кажа, што «гэта такая сувязь з родам і з Радзімай».
Марыя расказала сакрэты дагляду за раслінамі на балконе:
— Тым, хто хоча завесці гарод на балконе, трэба зважаць, што ты будзеш да яго прывязаны. Гаршэчкі маленькія, зямля ў іх хутка сохне, асабліва па такой спёцы. У самыя гарачыя дні я іх палівала два разы на дзень.
Ты асабліва нікуды надоўга не з’едзеш, таму што трэба іх сядзець-глядзець. А знайсці чалавека, які б кожны дзень прыходзіў паліваць чужыя расліны, даволі складана. Калі мы збіраліся ў адпачынак, я выразала палову гароду, а другую частку пакінула на волю лёсу. І гэтыя расліны неяк выжылі.
Вельмі файная рэч — кампостнае вядро. Яно, праўда, хутка запаўняецца, а потым трэба доўга чакаць, пакуль яно прапрацуецца. Я ўжо думала туды якіх-небудзь чарвей пасадзіць. Можна не набываць угнаенні, а самой рабіць глебу. Ружы ў мяне, дарэчы, растуць у былым кампостным вядзерцы.
Добра мець аплікацыю ці дасведчанага чалавека, які дапаможа хутка зразумець, на што захварэлі расліны. Напрыклад, шкоднік павуцінны клешч, калі яго не дагледзець, можа вельмі хутка з’есці ўвесь гародзік, бо на балконе расліны стаяць вельмі шчыльна.
Не трэба сыходзіць у «раслінны запой», трэба цвяроза ацэньваць, колькі ты маеш месца. Бо я заставіла і засадзіла ўсё вельмі шчыльна, і не ўсім раслінам хапіла «жыццёвай прасторы».