Больш за год таму ў тэлеграм-канале лідара Ліберальна-дэмакратычнай партыі Беларусі (ЛДПБ) Алега Гайдукевіча быў апублікаваны фотаздымак пеніса ў эрэкцыі. З тых часоў, паводле словаў палітыка, так і не знайшлося пераканаўчых доказаў таго, што ў сеціва трапіў здымак менавіта яго геніталій. Пра гэта прэтэндэнт у кандыдаты на прэзідэнцкіх выбарах 2025 года расказаў у інтэрв'ю выданню tochka.by.
Палітык падкрэсліў, што інцыдэнт з пікантным фота адбыўся праз месяц пасля разводу. Паводле Гайдукевіча, з былой жонкай яму ўдалося захаваць «цудоўныя адносіны».
— Усё пакінуў пасля разводу ёй. Мяне так выхоўваў бацька, — расказаў палітык.
Каментуючы інцыдэнт з дыкпікам, лідар ЛДПБ па-ранейшаму настойваў, што ў яго телеграм-канале было апублікаванае фота не ягонага пеніса. Журналісту tochka.by палітык прапанаваў «рабіць працу якасней» і знайсці жанчын, «якія могуць даць адназначную ацэнку: чыя гордасць на фота».
— Я да гэтага ніякага дачынення не маю. А калі б меў, даўным-даўно ўсё гэта даказалі і паказалі б, — упэўнены Гайдукевіч.
Пры гэтым палітык прызнаўся, што яго канал вядуць некалькі чалавек — правы адміністратара ёсць у памочнікаў, часам пасты піша і прэс-служба.
Нагадаем, пасля інцыдэнту «Наша Ніва» параўнала здымак, што з’явіўся ў тэлеграм-канале дэпутата, з раней апублікаванымі фота яго самога, і заўважыла «падабенства ў форме пазногцевых пласцін і наяўнасці радзімкі на левай руцэ». Тады Гайдукевіч раіў «тым, хто сядзіць, разглядае рукі, яшчэ нешта, полавыя органы», заняцца справай.
Чытайце таксама
