У аўторак у цэнтральнай частцы сектара Газа ў выніку абстрэлу загінула больш за 20 ізраільскіх вайскоўцаў. Гэта самыя шматлікія аднаразовыя страты ў шэрагах ізраільскай арміі з пачатку ваеннай аперацыі ЦАХАЛ супраць ХАМАС пасля нападу баевікоў 7 кастрычніка, піша Руская служба Бі-бі-сі.
Дакладная колькасць загінулых пакуль невядомая. Прадстаўнік ЦАХАЛ адмірал Даніэль Хагары паведаміў пра 21 вайскоўца, шэраг ізраільскіх крыніц піша, што загінулі 24 чалавекі.
Як менавіта гэта адбылося, пакуль таксама ўдакладняецца.
«Мы пакуль вывучаем абставіны здарэння і расследуем прычыны выбухаў», — сказаў Хагары.
Паводле папярэдняй версіі Арміі абароны Ізраіля, вайскоўцы знаходзіліся ў двух будынках, дзе заклалі выбуховыя прылады для іх разбурэння. Аднак прылады здэтанавалі раней, чым салдаты паспелі адтуль выйсці.
Як мяркуецца, будынкі трапілі пад гранатамётны агонь баевікоў.
Таксама паведамляецца, што на тым жа пятачку быў абстраляны ізраільскі танк, і, магчыма, частка ахвяр — экіпаж танка.
Паводле інфармацыі ізраільскіх уладаў, большасць загінулых — рэзервісты.
«Нашыя рэзервісты ахвяравалі самым дарагім, каб мы ўсе маглі жыць тут у поўнай бяспецы», — сказаў Хагары.
Прэзідэнт Ізраіля Іцхак Херцаг заявіў, што Ізраіль перажывае «невыносна цяжкую раніцу».
Міністр абароны Ізраіля Ёаў Галант паабяцаў, што гэтыя смерці яшчэ больш падштурхнуць Ізраіль да дасягнення яго баявых мэтаў.
Сітуацыя на полі бою
Інцыдэнт адбыўся на фоне прасоўвання ізраільскай арміі ўглыб сектара пры агнявой падтрымцы з паветра, зямлі і мора.
У аўторак ізраільскае камандаванне заявіла, што ЦАХАЛ завяршыў акружэнне горада Хан-Юніс, чаму папярэднічалі некалькі дзён лютых баёў.
Мінздароўя Газы, якое знаходзіцца пад кантролем ХАМАС, заяўляе, што за апошнія суткі па ўсім сектары загінулі 195 палестынцаў, больш за 350 — параненыя. Праверыць незалежна гэтыя звесткі немагчыма.
Раней палестынскае аддзяленне Чырвонага Паўмесяца паведаміла, што ізраільская артылерыя нанесла ўдар па офісе арганізацыі, які размяшчаецца на поўдзень ад Хан-Юніса. Падчас абстрэлу ў будынку нібыта хаваліся мірныя палестынцы, некаторыя атрымалі раненні. Пацверджання гэтай інфармацыі таксама пакуль няма.
У гэты момант войскі ЦАХАЛ прасоўваюцца да прыбярэжнага раёна аль-Мавасі, які раней ізраільцяне абвясцілі бяспечнай зонай.
ЗША просяць Ізраіль выконваць міжнародныя нормы
ЗША просяць Ізраіль рабіць усё для абароны мірных палестынцаў, персаналу і пацыентаў бальніц.
Напярэдадні ў адрас Ізраіля прагучалі абвінавачанні з боку палестынскіх медыкаў, што вайскоўцы ЦАХАЛ урываюцца ў бальніцы і паводзяць сябе агрэсіўна ў дачыненні да медыкаў і хворых. Ізраіль гэтыя абвінавачанні ніяк не каментуе, а іншых пацверджанняў, акрамя палестынскіх крыніц, ім няма.
Ізраіль, наадварот, заяўляе, што баевікі ХАМАС выкарыстоўваюць бальніцы як прыкрыццё.
Напярэдадні дарадца па нацыянальнай бяспецы ЗША Джон Кірбі заявіў, што ЗША не перастаюць прызнаваць права Ізраіля на самаабарону, але просяць ізраільскіх партнёраў выконваць нормы міжнароднага права ў дачыненні да мірнага насельніцтва.