Крыніца ва ўрадзе Азербайджана расказала Euronews, што пашкоджанаму самалёту Embraer 190 авіякампаніі Azerbaijan Airlines не дазволілі прызямліцца ў расійскіх аэрапортах. А звесткі папярэдняга расследавання пацвердзілі, што расійская ракета над Грозным стала прычынай трагедыі ў Актау.
Азербайджанскія ўрадавыя крыніцы пацвердзілі Euronews у чацвер, 26 снежня, што расійская ракета класа «зямля-паветра» стала прычынай крушэння самалёта «Азербайджанскіх авіяліній» у казахстанскім Актау ў сераду.
Паводле крыніц ва ўрадзе, ракета была выпушчаная па рэйсе 8432 падчас пралёту беспілотнай авіяцыі над Грозным, і яе аскепкі трапілі ў пасажыраў і экіпаж, узарваўшыся побач з самалётам у сярэдзіне палёту.
Урадавыя крыніцы заявілі Euronews, што пашкоджанаму самалёту не дазволілі прызямліцца ў расійскіх аэрапортах, нягледзячы на просьбы пілотаў пра экстранную пасадку, і загадалі ляцець праз Каспійскае мора ў бок Актау ў Казахстане. Паводле атрыманых звестак, сістэмы GPS-навігацыі самалёта былі заглушаныя на ўсёй дарозе палёту над морам.
Нагадаем, авіякатастрофа здарылася 25 снежня. Самалёт Embraer 190AR «Азербайджанскіх авіяліній» выконваў рэйс Баку — Грозны. Яго перанакіравалі ў Махачкалу нібыта праз туман, а адтуль лайнер вылецеў у казахстанскі горад Актау з прычыны няштатнай сітуацыі. На борце было 67 чалавек, у тым ліку 16 расіян. З іх сямёра загінулі, агульная колькасць ахвяр — 38.
Выжылыя пасажыры расказалі, што на борце было некалькі выбухаў. Хваставая частка лайнера мела мноства адтулін, іх прычына пакуль не высветленая, але эксперты мяркуюць, што гэта мог быць абстрэл расійскай СПА.